កំពត៖ កាលពីថ្ងៃទី២៩ ខែកញ្ញា ឆ្នាំ២០២៦ លោក អ៉ឹម ច័ន្ទសោធន អភិបាលនៃគណៈអភិបាលស្រុកទឹកឈូ បានឧបត្ថម្ភថវិកាចំនួន ៥,០០០,០០០រៀល (ប្រាំលានរៀលគត់) តាមរយៈលោកអធិការនគរបាលស្រុកទឹកឈូ ដើម្បីចូលរួមចំណែកក្នុងការកសាងអគារប៉ុស្តិ៍នគរបាលរដ្ឋបាលត្រពាំងសង្កែ ស្ថិតក្នុងអធិការដ្ឋាននគរបាលស្រុកទឹកឈូ ខេត្តកំពត សំដៅពង្រឹងហេដ្ឋារចនាសម្ព័ន្ធបម្រើការងារសន្តិសុខ និងសុវត្ថិភាពជូនប្រជាពលរដ្ឋក្នុងមូលដ្ឋាន។

កំពត៖ រដ្ឋបាលស្រុកឈូក នៅថ្ងៃទី០១ ខែតុលា ឆ្នាំ២០២៦នេះ បានប្រកាសជូនដំណឹងតាមរយៈទំព័រហ្វេសប៊ុកផ្លូវការ ដល់យុវជនក្នុងដែនសមត្ថកិច្ច ឱ្យអញ្ជើញមកទទួល និងដាក់ពាក្យសុំចូលបំពេញកាតព្វកិច្ចយោធា នៅមូលដ្ឋានកងរាជអាវុធហត្ថស្រុកឈូក ស្ថិតក្នុងភូមិព្រេច ឃុំបឹងនិមល ស្រុកឈូក ខេត្តកំពត ចាប់ពីថ្ងៃចន្ទ ដល់ថ្ងៃសៅរ៍ រៀងរាល់ម៉ោងធ្វើការ ដើម្បីចូលរួមបំពេញកាតព្វកិច្ចការពារជាតិ និងបម្រើមាតុភូមិ។

កំពត៖ យុវតីនៅខេត្តកំពតបញ្ជាក់ថា បច្ចុប្បន្ន ស្ត្រីក៏មានសិទ្ធិ និងមានស្មារតីស្នេហាជាតិ មាតុភូមិ ដូចបុរសដែរ។ ហើយទិដ្ឋភាពដ៏ឈឺចាប់ នៃការឈ្លានពានរបស់ទាហានសៀមមកលើប្រជាជនកម្ពុជា ជាកត្តាជំរុញ ចិត្តឲ្យពួកគេមានភាពអង់អាចក្លាហាន ក្នុងការមកសុំស្ម័គ្រចូលបំពេញកាតព្វកិច្ចយោធា។យុវតីដែលបានមកទទួលពាក្យ បានថ្លែងអំណរគុណដល់រាជរដ្ឋភិបាលដែលបើកឱកាសដល់ស្ត្រី បានបង្ហាញអំពីស្មារតី និងសមត្ថភាព ដើម្បីរួមចំណែកអភិវឌ្ឍវិស័យោធា និងការពារជាតិ ដូចបុរសដែរ។

កំពត៖ ថ្ងៃនេះជាថ្ងៃដំបូង នៃការបើកផ្តល់ពាក្យសុំចូលបំពេញកាតព្វកិច្ចយោធា ហើយនៅតាមមូលដ្ឋានកងរាជអាវុធហត្ថ ក្រុង ស្រុក នៃខេត្តកំពត មានក្រុមយុវជនដែលជាសិស្ស ជាបុគ្គលិកក្រុមហ៊ុន បាននាំគ្នាមកទទួលពាក្យសុំជាបណ្តើរៗហើយ។ ក្រុមយុវជនយល់ឃើញថា ការមកសុំពាក្យចូលបំពេញកាតព្វកិច្ចមុនគេនេះ គឺដោយសារស្មារតីស្រឡាញ់ពេញចិត្ត ចំពោះកិច្ចការងារការពារជាតិ មាតុភូមិ និងជាចំណែកអភិវឌ្ឍខ្លួន ឲ្យក្លាយជាធនធានយោធិនល្អម្នាក់ នាពេលអនាគត។

កំពត៖ អភិបាលខេត្តកំពត ណែនាំមន្ត្រីជំនាញ និងអាជ្ញាធរគ្រប់មូលដ្ឋាន ឱ្យយកសុខទុក្ខ និងប្រយោជន៍របស់ប្រជាពលរដ្ឋជាធំ ដោយមិនត្រូវយកបញ្ហាបច្ចេកទេសមកធ្វើជាលេស ឬដាក់បន្ទុកលើប្រជាពលរដ្ឋឡើយ។ ទន្ទឹមនោះ ត្រូវពន្លឿនការដោះស្រាយបញ្ហាសេវាសាធារណៈ សន្តិសុខ សណ្តាប់ធ្នាប់ និងត្រៀមលក្ខណៈឱ្យបានល្អក្នុងឱកាសបុណ្យកាន់បិណ្ឌ និងភ្ជុំបិណ្ឌ ដើម្បីផ្តល់ភាពកក់ក្តៅជូនប្រជាពលរដ្ឋ និងភ្ញៀវទេសចរ។

កំពត៖ នៅព្រឹកថ្ងៃទី២៩ ខែកញ្ញា ឆ្នាំ២០២៦ អាជ្ញាធរស្រុកទឹកឈូ និងអាជ្ញាធរមូលដ្ឋានឃុំស្ទឹងកែវ បានចុះត្រួតពិនិត្យផ្ទាល់ និងចាត់ចែងក្រុមការងារប្រើប្រាស់គ្រឿងចក្រ ដើម្បីកាយរំដោះមុខទឹកជំនន់ជាបន្ទាន់ នៅចំណុចភូមិអន្លង់ម៉ាក់ប្រាង្គ ឃុំស្ទឹងកែវ ស្រុកទឹកឈូ ខេត្តកំពត បន្ទាប់ពីប្រព័ន្ធលូស្ទះបង្កឲ្យមានទឹកជំនន់លិចលង់ផលដំណាំកសិកម្មរបស់ប្រជាពលរដ្ឋ។