ព័ត៌មានក្នុងខេត្ត

បាត់ដំបង៖ អនុវត្តន៍តាមអនុសាសន៍ របស់ឯកឧត្តម សុខ លូ ប្រធានគណៈកម្មាធិការសាខា នៅព្រឹកថ្ងៃទី១០ ខែសីហា ឆ្នាំ២០២៦ ក្រុមការងារអនុសាខាកាកបាទក្រហមកម្ពុជាថ្មគោល ដែលដឹកនាំដោយលោក តេង គឹមស៊ាន អភិបាលស្រុក និងជាប្រធានគណៈកម្មាធិការអនុសាខាកាកបាទក្រហមកម្ពុជា ស្រុកថ្មគោល និងសហការី រួមដំណើរជាមួយក្រុមកាកបាទក្រហមឃុំ អ្នកស្ម័គ្រចិត្ត បានចុះសួរសុខទុក្ខ និងនាំយកអំណោយមនុស្សធម៌ របស់សប្បុរសជនតាមរយៈអនុសាខាស្រុកទៅផ្តល់ ជូនគ្រួសារប្រជាពលរដ្ឋ ដែលរងគ្រោះដោយអគ្គីភ័យ (ភ្លើងឆេះផ្ទះ) ចំនួន១គ្រួសារ កាលពីថ្ងៃទី៨ ខែសីហា ឆ្នាំ២០២៦ វេលាម៉ោង ២៖២០នាទីរសៀល ស្ថិតនៅនៅភូមិអូរតាគី ឃុំអូរតាគី ស្រុកថ្មគោល ខេត្តបាត់ដំបង ។

ខេត្តបាត់ដំបង៖ កម្លាំងជំនាញនៃស្នងការដ្ឋាននគរបាលខេត្តបាត់ដំបង បានបន្តចុះត្រួតពិនិត្យទីតាំងលក់ម្ហូបអាហារ ឱសថស្ថាន និងទីតាំងលក់គ្រឿងឧបភោគបរិភោគមួយចំនួននៅក្នុងក្រុងបាត់ដំបង ដើម្បីស្វែងរកទំនិញ និងឱសថផុតកាលបរិច្ឆេទប្រើប្រាស់ (ខូចគុណភាព) ដែលនៅតែដាក់លក់លើទីផ្សារ។ ការត្រួតពិនិត្យនេះបានធ្វើឡើងកាលពីថ្ងៃទី៤ ខែសីហា ឆ្នាំ២០២៦។

(បាត់ដំបង)៖ នៅរសៀលថ្ងៃទី១៧ ខែកក្កដា ឆ្នាំ២០២៦ លោកស្រេង សុខា អភិបាលស្រុកនិងជា ប្រធានគណៈ កម្មាធិការអនុសាខាកាកបាទក្រហមកម្ពុជា ស្រុកបាណន់ចាត់អោយលោកស្រី សួង ស៊ីណា អភិបាលរងស្រុក និងសហការីបានចុះសួរសុខទុក្ខ និងនាំយកអំណោយមនុស្សធម៌ របស់សប្បុរសជន ផ្តល់ជូនគ្រួសារ លោកស្រី ជុំសារឿន អាយុ៣១ឆ្នាំ ដែលជាប្រជាពលរដ្ឋងាយរងគ្រោះបំផុតកំពុងជួបការលំបាកក្នុង ជីវភាពរស់នៅប្រចាំថ្ងៃ ស្ថិនៅភូមិស្វាយប្រគាប ឃុំឈើទាល ស្រុកបាណន់ ខេត្តបាត់ដំបង។ មានមតិសំណេះសំណាលនាឱកាសនោះ ក្នុងនាមលោក ស្រេង សុខា លោកស្រី សួង ស៊ីណាតបានពាំនាំ នូវប្រសាសន៍របស់ឯកឧត្តម សុខ លូ អភិបាលខេត្តនិងជាប្រធានគណៈកម្មាធិការ សាខាខេត្ត ជាពិសេស សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ដែលផ្ដាំផ្ញើសួរសុខទុក្ខ ក្តីនឹករលឹក អាណិតស្រឡាញ់ យ៉ាងជ្រាលជ្រៅ និងគិតគូរជានិច្ច ចំពោះសុខទុក្ខរបស់បងប្អូនប្រជាពលរដ្ឋ ដែលជួបការលំបាក ដោយមិន ប្រកាន់ពីនិន្នាការណាមួយឡើយ។

(បាត់ដំបង)៖ ក្រុមការងារអនុសាខាកាកបាទក្រហមកម្ពុជា ស្រុកមោងឬស្សី ដឹកនាំដោយ លោក ឡុង សុភឺន អនុប្រធានគណៈកម្មាធិការអនុសាខាស្រុក និងសហការី នាព្រឹកថ្ងៃទី១៥ ខែកក្កដា ឆ្នាំ២០២៦ បានចុះសួរសុខទុក្ខ និងនាំយកអំណោយមនុស្សធម៌ របស់សប្បុរសជន ផ្តល់ជូនគ្រួសារ ប្រជាពលរដ្ឋងាយរងគ្រោះបំផុត រួមមាន ជនចាស់ជរា ជនមានពិការភាព ស្រ្តីមេម៉ាយ ដែលជួបការលំបាក ក្នុងជីវភាពរស់នៅប្រចាំថ្ងៃចំនួន ១០ គ្រួសារ នៅឃុំជ្រៃ និងឃុំតាលាស់ស្រុកមោងឫស្សី ខេត្តបាត់ដំបង។

បាត់ដំបង៖ រដ្ឋបាលស្រុកបវេល បានបើកយុទ្ធនាការទ្រង់ទ្រាយធំមួយ ដោយធ្វើតេស្តរហ័សរកសារធាតុញៀនលើមន្ត្រីរដ្ឋបាល និងអាជ្ញាធរមូលដ្ឋានគ្រប់លំដាប់ថ្នាក់ សរុបជាង ៤០០ នាក់។ គោលបំណងគឺដើម្បីបង្ហាញភាពជាគំរូ និងប្តេជ្ញាចិត្តយ៉ាងម៉ឺងម៉ាត់ក្នុងការលុបបំបាត់គ្រឿងញៀនពីរង្វង់រាជការ។ ការត្រួតពិនិត្យនេះបានប្រព្រឹត្តទៅ កាលពីរសៀលថ្ងៃទី ៣០ ខែមិថុនា ឆ្នាំ ២០២៦ នៅបរិវេណសាលាស្រុកបវេល ដោយមានកិច្ចសហការពីកម្លាំងជំនាញនៃស្នងការដ្ឋាននគរបាលខេត្តបាត់ដំបង។

បាត់ដំបង៖ អនុវត្តន៏តាមអនុសាសន៍របស់ឯកឧត្តម សុខ លូ អភិបាលខេត្តនិងជាប្រធានគណៈកម្មាធិការសាខាកាកបាទក្រហមកម្ពុជាខេត្តបាត់ដំបង នៅព្រឹកថ្ងៃទី១៧ ខែមិថុនា ឆ្នាំ២០២៦ ក្រុមការងារអនុសាខាកាកបាទក្រហមកម្ពុជា ស្រុកសង្កែ ដឹកដោយ លោក នាង ចន្ទថារ៉ា អភិបាលស្រុកនិងជាប្រធានគណៈកម្មាធិការអនុសាខាកាកបាទក្រហមកម្ពុជា ស្រុកសង្កែ បាននាំយកអំណោយមនុស្សធម៌របស់សប្បុរសជនតាមរយៈអនុសាខាស្រុកផ្តល់ជូនប្រជាពលរដ្ឋចំនួន២០គ្រួសារដែលមានជីវភាពខ្វះខាត ចាស់ជរាគ្មានទីពឹង ក្នុងនោះ១៩គ្រួសារមកពីភូមិចំនួន៦ ក្នុងឃុំកំពង់ព្រៀង និង១គ្រួសាទៀតរស់នៅឃុំតាប៉ុនស្រុកសង្កែ ខេត្តបាត់ដំបង។

បាត់ដំបង៖ កម្លាំងនគរបាលស្រុកសំឡូត បានឃាត់ខ្លួនជនសង្ស័យចំនួន ៣ នាក់ បន្ទាប់ពីពួកគេប្រើប្រាស់ត្រាក់ទ័រ ២ គ្រឿង ឈូសបុកបំផ្លិចបំផ្លាញផ្ទះ និងរោងចំការរបស់ប្រជាពលរដ្ឋម្នាក់ឈ្មោះ ប៉ិ វ៉ាន់ ភេទប្រុស អាយុ ៦១ ឆ្នាំ បណ្តាលឱ្យខូចខាតយ៉ាងធ្ងន់ធ្ងរ។ ហេតុការណ៍នេះកើតឡើងនៅចំណុចវាលធ្មា ភូមិចម្លងរមាំងក្រោម ឃុំអូរសំរិល ស្រុកសំឡូត ខេត្តបាត់ដំបង កាលពីល្ងាចថ្ងៃទី ០៣ ខែមិថុនា ឆ្នាំ ២០២៦។

បាត់ដំបង៖ លោក យឹម សៀប អភិបាលរងខេត្តបាត់ដំបង ទទួលបន្ទុកដោះស្រាយវិវាទក្រៅប្រព័ន្ធតុលាការ បានបំភ្លឺជុំវិញករណីជម្លោះដីធ្លីទំហំ ៧០ ហិកតា រវាង ប៉ិ វ៉ាន់ (ហៅ ឡុង) និង សន រ៉ាណែត នៅភូមិចម្លងរមាំងក្រោម ឃុំអូរសំរិល ស្រុកសំឡូត។

បាត់ដំបង៖ មន្រ្តីជំនាញ និងអាជ្ញាធរមូលដ្ឋាន បានចុះទប់ស្កាត់ទីតាំងស្តុបរ៉ែមាសខុសច្បាប់មួយកន្លែង នៅជើងភ្នំព្រឹក ស្ថិតក្នុងភូមិ ឃុំ និងស្រុកភ្នំព្រឹក ខេត្តបាត់ដំបង កាលពីថ្ងៃទី២៥ ខែឧសភា។ បន្ទាប់មកបានបន្តស្រាវជ្រាវរកម្ចាស់ទីតាំង ដើម្បីពិន័យ និងអនុវត្តនីតិវិធីតាមច្បាប់រ៉ែ។

បាត់ដំបង៖ រដ្ឋបាលស្រុកសំឡូត បានបើកប្រតិបត្តិការចុះពិនិត្យ និងចាត់វិធានការភ្លាមៗ ក្រោយទទួលបានសេចក្តីរាយការណ៍ថា មានការលួចដឹកជញ្ជូនទុរេនពីប្រភពខាងក្រៅ មកចរាចរណ៍លក់ដុំនៅក្នុងភូមិសាស្ត្រសំឡូតចាស់។ ការប្រព្រឹត្តបែបនេះត្រូវបានសង្ស័យថាជាការបន្លំភ្នែកអតិថិជន និងបំផ្លាញកេរ្តិ៍ឈ្មោះទុរេនសំឡូតពិតប្រាកដ។

មន្រ្តីជំនាញមន្ទីររ៉ែ និងឋាមពលខេត្ត សហការជាមួយកម្លាំងយោធា ប៉ុស្តិ៍នគរបាលការពារព្រំដែន និងរដ្ឋបាលស្រុកភ្នំព្រឹក បានចុះធ្វើការរុះរើទីតាំងជីករករ៉ែមាសខុសច្បាប់ នៅតាមមាត់អូរព្រំដែនចំនួន ៥ កន្លែង កាលពីថ្ងៃទី ២៧ ខែឧសភា ឆ្នាំ ២០២៦។

បាត់ដំបង៖ ប៉ុន្មានថ្ងៃមកនេះ មានការផ្សព្វផ្សាយព្រោងព្រាត និងចែករំលែកថា មានទីតាំងល្បែងអនឡាញ (ណេត) ចំនួន ៥ ទីតាំង នៅក្នុងចំណុចរ៉ារថភ្លើង ស្ថិតនៅសង្កាត់ស្វាយប៉ោ ក្រុងបាត់ដំបង ដោយមានភ្ជាប់រូបភាពផងដែរ។ ការចែករំលែកព័ត៌មាននេះ បានបង្កឱ្យមានការរិះគន់លើការងាររបស់សមត្ថកិច្ចក្រុង ដែលត្រូវបានចោទថាបណ្តែតបណ្តោយឱ្យមានល្បែងណេត។