ព័ត៌មានក្នុងខេត្ត

បាត់ដំបង៖ ក្រសួងការងារ និងបណ្ដុះបណ្ដាលវិជ្ជាជីវៈ បានបើកសិក្ខាសាលា ស្តីពី ប្រឹក្សាយោបល់ប្រមូលធាតុចូលលើសេចក្តីព្រាងគោលនយោបាយជាតិ ស្តីពីការអភិវឌ្ឍជំនាញបច្ចេកទេស និងវិជ្ជាជីវៈ ឆ្នាំ២០២៦-២០៣៥ ដែលប្រព្រឹត្តិទៅនាព្រឹកថ្ងៃទី០៦ ខែកក្កដា ឆ្នាំ២០២៦ នៅសាលប្រជុំសណ្ឋាគារប្រេស៊ីដង់ ក្រុងបាត់ដំបង ដោយមានការអញ្ជើញចូលរួមពី ឯកឧត្តមបណ្ឌិត ជួប ឋិតឋេរឫទ្ធិ អនុរដ្ឋលេខាធិការក្រសួងការងារ និងបណ្តុះបណ្តាលវិជ្ជាជីវៈ លោក ទីន សារ៉ាវុធ អភិបាលរងខេត្តបាត់ដំបង ថ្នាក់ដឹកនាំក្រសួងការងារ និងបណ្តុះបណ្តាលវិជ្ជាជីវៈ តំណាងអគ្គនាយកដ្ឋាន អ.ប.វ. និងអគ្គនាយកដ្ឋានពាក់ព័ន្ធ ទីប្រឹក្សាអមក្រសួង គ្រឹះស្ថានធីវេត វិស័យឯកជនជាដៃគូ អង្គការសមាគម ជាដៃគូសហការជាមួយវិទ្យាស្ថានពហុបច្ចេកទេសភូមិភាគតេជោសែនខេត្តបាត់ដំបង ព្រមទាំងសិស្ស និស្សិតជាច្រើនរូបទៀត។

បាត់ដំបង ៖ ក្រោយពីសម្ពោធដាក់ឱ្យដំណើរការជាផ្លូវការរោងចក្រប្រព្រឹត្តកម្មទឹកស្អាតថ្មី នៅរោងចក្រប្រព្រឹត្តកម្មទឹកស្អាតកំពង់សីមា ស្ថិតក្នុងភូមិកំពង់សីមា សង្កាត់វត្តគរ ក្រុងបាត់ដំបង ខេត្តបាត់ដំបង កាលពីថ្ងៃទី៣០ ខែមេសា ឆ្នាំ២០២៦កន្លងមកនោះ ឯកឧត្តម ហ៊ុល បុណ្ណារិទ្ធ អនុរដ្ឋលេខាធិការក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ និងជានាយកគម្រោងផ្គត់ផ្គង់ទឹកស្អាត និងអនាម័យ ហៅកាត់ថា PMU (ភី អឹម យូ) នាថ្ងៃទី០១ ខែកក្កដា ឆ្នាំ២០៦ បានដឹកនាំក្រុមការងារម្ចាស់គម្រោងទីភ្នាក់ងារបារាំងសម្រាប់ការអភិវឌ្ឍន៍ ហៅកាត់ថា AFD(អាហ្វេសដេ)នៃគម្រោងពង្រីកសមត្ថភាពប្រព័ន្ធផ្គត់ផ្គង់ទឹកស្អាត និងអនាម័យខេត្តបាត់ដំបង បានចុះបំពេញទស្សនកិច្ចសិក្សាស្វែងយល់អំពីខ្សែច្រវាក់ផលិតកម្មរោងចក្រប្រព្រឹត្តកម្មទឹកស្អាតកំពង់សីមា ស្ថិតនៅភូមិកំពង់សីមា សង្កាត់វត្តគរ ក្រុងបាត់ដំបង ខេត្តបាត់ដំបង ។

បាត់ដំបង៖ នៅព្រឹកថ្ងៃទី៣០ ខែមិថុនា ឆ្នាំ២០២៦ ឯកឧត្តម អ៊ុក ឃ្នួច អគ្គលេខាធិការរង សមាគមអតីតយុទ្ធជន និងនិវត្តជនកម្ពុជា តំណាងដ៏ខ្ពង់ខ្ពស់ ឯកឧត្តមកិត្តិសង្គហបណ្ឌិត គន់ គីម ទេសរដ្ឋមន្រ្តី អនុប្រធាន និងជាអគ្គលេខាធិការសមាគមអតីតយុទ្ធជន និងនិវត្តជនកម្ពុជា បានដឹកនាំក្រុមការងារអ.ន.ក.ខេត្ត, ក្រុង, ស្រុក, ឃុំ សង្កាត់ ចុះប្រគល់ផ្ទះចំនួន ៤ខ្នងជាអំណោយដ៏ថ្លៃថ្លារបស់សម្តេចតេជោ ហ៊ុន សែន និងសម្តេចកិត្តិព្រឹទ្ធបណ្ឌិត ប៊ុន រ៉ានី ជូនសមាជិកមានជីវភាពខ្វះខាត ដែលមានដីអត់ផ្ទះ ចំនួន៤ខ្នង ទី១ ឈ្មោះ ផូ សុផល ភេទប្រុស អាយុ៦២ឆ្នាំ ជានិវត្តជន រស់នៅភូមិអង់ សង្កាត់អូរចារ ក្រុងបាត់ដំបង, ទី២ ឈ្មោះ សឿន វ៉ាត់ ភេទប្រុស អាយុ៧១ឆ្នាំ ជានិវត្តជន រស់នៅភូមិបល្ល័ង្គ សង្កាត់វត្តគរ ក្រុងបាត់ដំបង, ទី៣ ឈ្មោះ ឈន ឆេង ភេទប្រុស អាយុ៦៨ឆ្នាំ មានទីលំនៅភូមិរំចេក៣ សង្កាត់រតនៈ ក្រុងបាត់ដំបង និងទី៤ ឈ្មោះ ថោង យឿត ភេទ ប្រុស អាយុ ៥១ឆ្នាំ ជនពិការ មានទីលំនៅភូមិបាក់រទេះ ឃុំព្រែកហ្លួង ស្រុកឯកភ្នំ។

បាត់ដំបង៖ រដ្ឋបាលខេត្តបាត់ដំបង នាព្រឹកថ្ងៃទី៣០ ខែមិថុនា ឆ្នាំ២០២៦ បានបើកសិក្ខាសាលាផ្សព្វផ្សាយ ស្តីពី តួនាទី ភារកិច្ច និងសិទ្ធិអំណាច របស់ការិយាល័យប្រជាពលរដ្ឋ និងកម្មវិធីទូរសព្ទដៃ «មតិយើង» ដែលប្រព្រឹត្តិទៅនៅសាលប្រជុំសាលាខេត្តបាត់ដំបង ក្រោមអធិបតីភាព ឯកឧត្តម អ៊ុយ រី ប្រធានក្រុមប្រឹក្សាខេត្តបាត់ដំបង និងដោយមានការអញ្ជើញចូលរួមពី លោក ធូ ភា អភិបាលរងខេត្តបាត់ដំបង លោក លោកស្រី ឯកឧត្តម លោកជំទាវសមាជិកក្រុមប្រឹក្សាខេត្ត លោក លោកស្រី ប្រធានក្រុមប្រឹក្សាក្រុងស្រុកទាំង១៤ គណៈភិបាលអភិបាលក្រុងស្រុកទាំង១៤ និងលោក លោកស្រី មកពីមន្ទីរអង្គភាពនានាក្នុងខេត្ត។

បាត់ដំបង៖ លោក មូល ធន អភិបាលរងខេត្តបាត់ដំបង បានដឹកនាំកិច្ចប្រជុំក្រុមការងារកសាងផែនការអភិវឌ្ឍន៍ និងកម្មវិធីវិនិយោគបីឆ្នាំរំកិលខេត្ត ដើម្បីពិនិត្យបញ្ជីតម្រូវការគម្រោងសកម្មភាពជាអាទិភាព របស់កម្មវិធីវិនិយោគបីឆ្នាំរំកិល(២០២៧-២០២៩) ត្រូវបានរៀបចំឡើង នាព្រឹកថ្ងៃទី២៩ ខែមិថុនា ឆ្នាំ២០២៦ នៅសាលប្រជុំសាលាខេត្តបាត់ដំបង ដោយមានការអញ្ជើញចូលរួមពី លោក លោកស្រី មកពីមន្ទីរអង្គភាពក្នុងខេត្ត និងរដ្ឋបាលក្រុងស្រុក។

បាត់ដំបង ៖ ក្នុងរយៈពេលប៉ុន្មានឆ្នាំចុងក្រោយនេះ ខេត្តបាត់ដំបងបាននឹងកំពុងអនុវត្តគម្រោងអភិវឌ្ឍន៍ហេដ្ឋារចនាសម្ព័ន្ធជាច្រើន ដើម្បីលើកកម្ពស់សោភ័ណភាពទីក្រុង និងអនាម័យបរិស្ថានជូនប្រជាពលរដ្ឋ។

បាត់ដំបង៖ ពាក់ព័ន្ធនឹងការងារនេះ អភិបាលខេត្តបាត់ដំបង ឯកឧត្តម សុខ លូ បានផ្តល់បទសម្ភាសន៍ជាមួយអ្នកព័ត៌មាននៃមន្ទីរព័ត៌មានខេត្តបាត់ដំបង ដោយបានបញ្ជាក់យ៉ាងដូច្នេះថា តាមគម្រោង យើងនឹងគ្រោងធ្វើការសាកល្បងពីចំណុចផ្សារធំបាត់ដំបង ឬហៅថាផ្សារណាត់ មកដល់ជិតម្តុំវិមានឯករាជ្យ តំបន់នេះនឹងគ្រោងធ្វើរយៈពេល៣ថ្ងៃក្នុងមួយសប្តាហ៍ គឺថ្ងៃសុក្រ សៅរ៍ និងថ្ងៃអាទិត្យ ។ ដែលរហូតមកដល់នឹងពេលនេះ ក្រុមការងារជំនាញកំពុងតែមមាញឹក ដើម្បីរៀបចំតូបសម្រាប់លក់អ្វីខ្លះ និងនៅកន្លែងណាអ្វីខ្លះ ? ហើយសង្ឃឹមថា ពេលបើកទីតាំងនេះនឹងមានការគាំទ្រច្រើនពីប្រជាពលរដ្ឋទូទៅ និងអាចបំពេញបន្ថែមតម្រូវការរបស់ប្រជាពលរដ្ឋក្នុងតំបន់នេះថែមទៀតផង ។

ក្រុមការងារបច្ចេកទេសខេត្តបាត់ដំបង កំពុងពន្លឿនបំពាក់ភ្លើងសូឡាបំភ្លឺពេលរាត្រី នៅតំបន់ផ្ទះអភិរក្ស ក្នុងក្រុងបាត់ដំបង ដើម្បីរួមចំណែកដល់ការលើកកម្ពស់វិស័យទេសចរណ៍ សម្រាប់ការទាក់ទាញកំណើនភ្ញៀវទេសចរមកលេងកម្សាន្តនៅខេត្តបាត់ដំបង កាន់តែមានការកើនឡើង ។

បាត់ដំបង៖ ដើម្បីបន្តកាត់បន្ថយអត្រាគ្រោះថ្នាក់ចរាចរណ៍ ពង្រឹងការយល់ដឹង អំពីច្បាប់ចរាចរណ៍ផ្លូវគោកនៅកម្ពុជា នាព្រឹកថ្ងៃទី២៤ ខែមិថុនា ឆ្នាំ២០២៦ លោកជំទាវ មឹន មាណវី រដ្ឋលេខាធិការក្រសួងសាធារណការ និងដឹកជញ្ជូន និងជាអគ្គលេខាធិការ នៃគណៈកម្មាធិការជាតិសុវត្ថិភាពចរាចរណ៍ផ្លូវគោក គ.ស.ច.គ បានអញ្ជើញចុះធ្វើយុទ្ធនាការអប់រំផ្សព្វផ្សាយ អំពីសុវត្ថិភាពចរាចរណ៍ផ្លូវគោក ការពាក់មួកសុវត្ថិភាព និងការបង្កើនសុវត្ថិភាព តាមរយៈការបើកភ្លើងស្វ័យប្រវត្តិពេលថ្ងៃ(AHO) ស្ថិតនៅតាមបណ្តោយផ្លូវជាតិលេខ៥ ភូមិថ្មគោល ឃុំតាម៉ឺន ស្រុកថ្មគោល ខេត្តបាត់ដំបង។

បាត់ដំបង៖ អនុក្រឹត្យ របស់រាជរដ្ឋាភិបាលកម្ពុជា ស្តីពីការតែងតាំងមន្រ្តីរាជការ សម្រេចតែងតាំង លោក ទេព ហន អភិបាលស្រុកមោងឫស្សី ឋានន្តរស័ក្តិឧត្តមមន្រ្តីថ្នាក់លេខ៤ មកជាអភិបាលរងនៃគណៈអភិបាលខេត្តបាត់ដំបង ជំនួសលោក ផេង សិទ្ធី ដែលត្រូវបានចូលនិវត្តន៍។ ពិធីប្រកាសចូលកាន់មុខតំណែងនេះ បានរៀបចំឡើង នារសៀលថ្ងៃទី២២ ខែមិថុនា ឆ្នាំ២០២៦ នៅសាលប្រជុំសាលាខេត្តបាត់ដំបង ក្រោមអធិបតីភាព ឯកឧត្តម ប៊ុន ហុន រដ្ឋលេខាធិការក្រសួងមហាផ្ទៃ ជាតំណាងដ៏ខ្ពង់ខ្ពស់ឯកឧត្តមអភិសន្តិបណ្ឌិត ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ និងដោយមានការអញ្ជើញចូលរួមពី ឯកឧត្តម អ៊ុយ រី ប្រធានក្រុមប្រឹក្សាខេត្ត និងឯកឧត្តម សុខ លូ អភិបាលនៃគណៈអភិបាលខេត្តបាត់ដំបង ព្រមទាំងឯកឧត្តម លោកជំទាវ លោក លោកស្រីគណៈប្រតិភូអមដំណើរ, ឯកឧត្តម លោកជំទាវ សមាជិកក្រុមប្រឹក្សាខេត្ត, អភិបាលរងខេត្ត, សាលាដំបូងខេត្ត, លោកឧត្តមសេនីយ៍ស្នងការនគរបាលខេត្ត, មេបញ្ជាការ, លោក លោកសី ប្រធាន អនុប្រធានមន្ទីរ អង្គភាពនានាជុំវិញខេត្ត និងលោក លោកស្រី ប្រធានក្រុមប្រឹក្សា គណៈអភិបាលក្រុង ស្រុកនៃខេត្តបាត់ដំបង។

បាត់ដំបង៖ ដើម្បីឆ្លើយតបទៅនឹងតម្រូវការចាំបាច់របស់ប្រជាពលរដ្ឋ ក្រុមការងារជំនាញបានប្រើប្រាស់គ្រឿងចក្រធុនធ្ងន់ជាច្រើន សម្រុកធ្វើសកម្មភាពជួសជុល និងថែទាំជាបណ្តោះអាសន្នលើកំណាត់ផ្លូវលេខ ៣ ក៏ដូចជាខ្សែផ្លូវមួយចំនួនទៀតក្នុងក្រុងបាត់ដំបង ដែលមានចរាចរណ៍មមាញឹក។

បាត់ដំបង៖ ឯកឧត្តមបណ្ឌិត អៀង ស៊ុនលី រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ និងជាប្រធានក្រុមប្រឹក្សាភិបាលរដ្ឋាករទឹកបាត់ដំបង អាណត្តិទី១ បានដឹកនាំគណៈប្រតិភូចុះត្រួតពិនិត្យសមិទ្ធិផល និងដំណើរការសង្វាក់ផលិតកម្មរបស់ «រោងចក្រប្រព្រឹត្តកម្មទឹកស្អាតកំពង់សីមា» កាលពីថ្ងៃទី១៥ ខែមិថុនា ឆ្នាំ២០២៦ ដែលមានទីតាំងស្ថិតនៅភូមិកំពង់សីមា សង្កាត់វត្តគរ ក្រុងបាត់ដំបង។